જમીન કે પાણીના ઉપયોગના હકક અંગેની તકરારો

(૧) પોલીસ અધિકારીના રિપોટૅ ઉપરથી કે બીજી માહિતી ઉપરથી કોઇ એકિઝકયુટિવ મેજિસ્ટ્રેટને જયારે પણ ખાતરી થાય કે પોતાની સ્થાનિક હકૂમતમાં કોઇ જમીન કે પાણીના વપરાશ સુખાધિકાર તરીકેના કે અન્ય પ્રકારના કોઇ કહેવાતા હકક સબંધમાં સુલેહનો ભંગ થવા સંભવ હોય તેવી તકરાર ચાલે છે તો તેણે પોતાને એ રીતે ખાતરી થવાના કારણો જણાવીને અને લેખિત હુકમ કરીને એવી તકરાર સાથે સબંધ ધરાવતા પક્ષકારોને નિર્દિષ્ટ કરેલી તારીખે અને સમયે જાતે કે વકીલ મારફત પોતાના ન્યાયાલયમાં હાજર થવા અને પોત પોતાના હકક દાવાના લેખિત કથન રજૂ કરવા ફરમાવવું જોઇશે. સ્પષ્ટીકરણ.- આ કલમના હેતુઓ માટે જમીન કે પાણી એ શબ્દોનો અથૅ કલમ-૧૬૪ ની પેટા કલમ

(૨)માં તેનો જે અથૅ કરવામાં આવેલ છે તે જ છે.

(૨) મેજિસ્ટ્રેટ એ રીતે રજૂ કરેલા નિવેદનો વાંચી પક્ષકારોને સાંભળી તેઓ પોત પોતાના રજૂ કરે તે તમામ પુરાવા લઇ એવા પુરાવાની અસર બાબત વિચારી પોતાને જરૂરી લાગે તેવો વધુ પુરાવો હોય તે લઇને અને શકય હોય તો એવો હકક છે કે કેમ તેનો નિણૅય કરવો જોઇશે અને એવી તપાસની બાબતમાં કલમ-૧૬૪ ની જોગવાઇઓ શકય હોય ત્યાં સુધી લાગુ પડશે.

(૩) તે મેજિસ્ટ્રેટને એવું જણાય કે એવો હકક છે તો તેવા હકકનો ભોગવટો કરવામાં દખલગીરી ન કરવાનો તે હુકમ કરી શકશે અને યોગ્ય હોય ત્યારે એવા કોઇપણ હકક ભોગવટામાં અડચણ હોય તો તેને દુર કરવાના હુકમનો પણ તેમા સમાવેશ કરી શકશે. પરંતુ એવો હકક વષૅ દરમ્યાન ગમે તે સમયે ભોગવી શકાય તેવો હોય ત્યારે જેના ઉપરથી પોલીસ તપાસ શરૂ થયેલ હોય તે પોલીસ અધિકારીનો રિપોર્ટ કે બીજી માહિતી પેટા કલમ (૧) હેઠળ મળ્યાની તરત પહેલાના ત્રણ મહિનાની અંદર એવો હકક ભોગવવામાં આવ્યો ન હોય તો અથવા તે હકક ફકત અમુક મોસમોમાં કે અમુક પ્રસંગોએ ભોગવી શકાય તેવો હોય ત્યારે એવી રીતે રિપોટૅ કે માહિતી મળ્યા પહેલાની છેલ્લી મોસમ દરમ્યાન કે છેલ્લા પ્રસંગે તે હકક ભોગવવામાં આવ્યો ન હોય તો તેવો કોઇ હુકમ કરી શકાશે નહી.

(૪) કલમ-૧૬૪ ની પેટા કલમ (૧) હેઠળ શરૂ કરાયેલી કોઇપણ કાયૅવાહીમાં મેજિસ્ટ્રેટને એવું જણાય કે તકરાર જમીન કે પાણીનો ઉપયોગ કરવાનો કહેવાતા હકક સાથે સબંધ ધરાવે છે ત્યારે પોતાના કારણોની નોંધ કર્યા પછી તે કાયૅવાહી પેટા કલમ (૧) હેઠળ શરૂ કરવામાં આવી હોય તેમ તેને ચાલુ રાખી શકાશે અને પેટા કલમ (૧) હેઠળ શરૂ કરાયેલ કોઇ કાયૅવાહીમાં મેજિસ્ટ્રેટને એવું જણાય તે તકરારની તજવીજ કલમ-૧૬૪ હેઠળ થવી જોઇએ તો પોતાના કારણોની નોંધ કર્યા પછી તે કાયૅવાહી કલમ-૧૬૪ ની પેટા કલમ (૧) હેઠળ શરૂ કરવામાં આવી હોય તેમ તેને ચાલુ રાખી શકાશે.